1888 წლის 6 დეკემბერს 12 საათზე ქართველთა შორის წერა-კითხვის გამავრცელებელი საზოგადოების წლიური კრება გაიხსნა. კრებაზე განიხილეს მოსწავლეების საკითხი. აღმოჩნდა, რომ ისინი სკოლაში ოთხი წელი არ სწავლობდნენ. საზოგადოების წევრთა აზრით, გამგეობა ამ საკითხის მოსაგვარებლად ვერაფერს გააკეთებდა, გარდა იმისა, რომ მასწავლებლებს მშობლებისთვის განემარტათ შვილები სკოლაში ოთხი წელი ეტარებინათ. კრებას ესწრებოდნენ საზოგადოების წევრები: ივანე გიორგის ძე მაჩაბელი, გიორგი ნიკოლოზის ძე იოსელიანი (წყალტუბელი), პეტრე გრიგოლის ძე მირიანაშვილი, ექვთიმე სვიმონის ძე თაყაიშვილი, ანტონ ნიკოლოზის ძე ფურცელაძე, ვასილ გიორგის ძე მაჩაბელი, ანდრია სოლომონის ძე ღულაძე, ნიკოლოზ ზებედეს ძე ცხვედაძე, ილია გრიგოლის ძე ჭავჭავაძე, დიმიტრი ალექსანდრეს (მხარგრძელის) ძე ფავლენიშვილი, რაჟდენ სოლომონის (არჯევანის) ძე ჯაჯანაშვილი.

წყარო: ქართველთა შორის წერა-კითხვის გამავრცელებელი საზოგადოების მორიგი და საგანგებო კრების ოქმები და წლიური ანგარიშები | 1887-1888
წყაროს ტიპი: საარქივო დოკუმენტი
გამოცემის ადგილი: თბილისი
ენა:ქართული
დაცულია: საქართველოს იუსტიციის სამინისტროს სსიპ საქართველოს ეროვნული არქივი