რეგისტრირებული ფაქტები81413
სორტირება თარიღი კლებადობით
1881
ტიპი: ავტორობა
1881 წლის 25 ნოემბერს მასწავლებელი ლეონტი ჯაში ქართველთა შორის წერა-კითხვის გამავრცელებელი საზოგადოების გამგეობას აუწყებს, რომ ქვატანის სკოლისთვის პირველ რიგში საჭიროა მოსწავლეთა მერხები, ჩუბინიშვილის რუსულ-ქართული ლექსიკონი, დიდებულიძის „საღმრთო ისტორია“ (თარგმნილი ქართულად), ევტუშევსკის „არითმეტიკის მეთოდიკა“, „ვეფხისტყაოსანი“, ქართველი მეფეების ცხოვრება და სხვა ქართული წიგნები, რამდენიც შესაძლო იქნება. ასევე ღარიბთათვის შესაწირავად საჭირო იყო 30 ეგზემპლარი „დედა ენა“, 30 ცალი წერის დედანი (ჯუღელის), 30 დახაზული საწერი რვეული, 5 ცალი „ბუნების კარი“, 20 ასპიდის დაფა თავისი გრიფელებით, კალმები, ოთხკუთხიანი სახაზავები. ის გამგეობას სთხოვს, აღნიშნულ ნივთები გამოაგზავნონ არა სამაზრო სასამართლოდან, არამედ პირდაპირ, რადგან სასწავლებელი არის რკინიგზის პირას, შემდეგ მისამართზე: აბაშის სადგური, ქვატანის სკოლა.
1881
ტიპი: ავტორობა
1881 წლის 25 ნოემბერს სოფელ ქვატანის (აბაშის რაიონი) სკოლის მასწავლებელმა ლეონტი ჯაშმა ქართველთა შორის წერა-კითხვის გამავრცელებელი საზოგადოების გამგეობას აცნობა, რომ სკოლის სახელზე არასდროს გამოგზავნილა სახელმძღვანელო წიგნები და სასწავლო ნივთები მისი მასწავლებლობისას და ასევე, არც მისი წინამოადგილეების დროს, როგორც მან გაარკვია.
1881
ტიპი: თანამდებობა
1881 წლის 25 ნოემბერს კავკასიის საცენზურო კომიტეტმა მეფისნაცვლის მთავარ სამმართველოს აცნობა, რომ თანახმა იყო ჟურნალ „ივერიის“ თანარედაქტორად ივანე მაჩაბელი დანიშნულიყო.
1881
ტიპი: ავტორობა
1881 წლის 24 ნოემბერს სოფელ ბაჯის სასწავლებლის მასწავლებელმა ე. ბოჭორიშვილმა ქართველთა შორის წერა-კითხვის გამავრცელებელი საზოგადოების გამგეობას მისწერა, რომ სკოლისათვის საჭირო იყო: „როდნოე სლოვო“ 1-ლი და მე-2 ნაწილი, ძველი და ახალი აღთქმის ისტორიის წიგნები, „ლოცვების ახსნა“, ევტუშევსკის „არითმეტიკული გამოცანების კრებული“, „დედა ენა“ და „ბუნების კარი“, თითოეული აღნიშნული სახელმძღვანელოს ღარიბთათვის დასარიგებლად გამგეობას უნდა გამოეგზავნა 6-6 ეგზემპლარი, ასევე სხვა სასწავლო ნივთები: ასპიდის დაფები, კუთხედი სახაზავები, კალმები, გრიფელები, საწერი ქაღალდი.
1881
ტიპი: ავტორობა
1881 წლის 23 ნოემბერს სოფელ შემოქმედის მასწავლებელმა ანტონ ცეცხლაძემ ქართველთა შორის წერა-კითხვის გამავრცელებელი საზოგადოების გამგეობას მისწერა, რომ ყურადღებას აქცევდა, სკოლაში დარიგებულ წიგნებს მოსწავლეები გაფრთხილებოდნენ. მან რამდენიმე ეგზემპლარი აჩუქა ძალიან ღარიბ, მაგრამ კარგი ყოფაქცევის და ბეჯით მოსწავლეებს.
1881
ტიპი: ავტორობა
1881 წლის 23 ნოემბერს სოფელ შემოქმედის სკოლის მასწავლებელმა ანტონ ცეცხლაძემ ქართველთა შორის წერა-კითხვის გამავრცელებელი საზოგადოების გამგეობას აცნობა, რომ 1881 წლის 29 აპრილს სკოლამ მიიღო „ბუნების კარი“ – 5, „დედა ენა“ – 25, გ. კალანდარიშვილის „პირველ დასაწყისი კურსი რუსული ენისა ქართველთათვის“ – 10, ა. ჯუღელის „წერის სასწავლო დედანი“ – 29.
1881
ტიპი: ავტორობა
1881 წლის 23 ნოემბერს მასწავლებელი ანტონ ცეცხლაძე ქართველთა შორის წერა-კითხვის გამავრცელებელი საზოგადოების გამგეობას აუწყებს, რომ სოფელ შემოქმედის სკოლის ღარიბ მოსწავლეთათვის დასარიგებლად საჭირო იყო შემდეგი სახელმძღვანელო მასალები: სოკოლოვის „ლოცვები, მცნებები და სიმბოლოები“ – 5 წიგნი, „როდნოე სლოვო“ I ნაწილი – 13, „როდნოე სლოვო“ II ნაწილი – 7, ევტუშევსკის „არითმეტიკული ამოცანების კრებული“ I ნაწილი – 17, „ბუნების კარი“ – 5, გ. კალანდარიშვილის „პირველ დასაწყისი კურსი რუსული ენისა“ – 12, ა. ჯუღელის „წერის სასწავლო დედანი“ – 19, რუსული წერის დედანი – 17, სუფთა წერის რვეულები ქართულისთვის – 31, რუსულისთვის – 31, ფანქრები – 31, ყველაზე მეტად ესაჭიროებოდათ ევტუშევსკის „არითმეტიკის მეთოდიკა“ სახელმძღვანელო მასწავლებელთათვის. 15 მოსწავლეს არ ჰქონდა ასპიდის დაფები. მისი აზრით, ვინაიდან ეს გასატეხი ნივთი იყო, უკეთესი იქნებოდა ქაღალდისაგან დამზადებული დაფა, ან გრიფელით საწერი დაფა.
1881
ტიპი: ავტორობა
1881 წლის 23 ნოემბერს მასწავლებელი ლუკა სვიმონის ძე გაბადაძე ქართველთა შორის წერა-კითხვის გამავრცელებელი საზოგადოების გამგეობას ღარიბ მოსწავლეთათვის დასარიგებლად სთხოვდა, გამოეგზავნათ 10-10 ცალი „დედა ენა“, ასპიდის დაფები, საწერლები, სახაზავები, ქართულისა და რუსულის რვეულები და საწერი კალმები.
1881
ტიპი: ავტორობა
1881 წლის 23 ნოემბერს მასწავლებელმა ლუკა სვიმონის ძე გაბადაძემ ქართველთა შორის წერა-კითხვის გამავრცელებელი საზოგადოების გამგეობას აცნობა, რომ სოფელ დეხვირის სკოლისთვის საჭირო იყო შემდეგი წიგნები და ნივთები: „დედა ენა“, „სიბრძნე-სიცრუისა“, „კაცია-ადამიანი“, „ვეფხისტყაოსანი“, ბარბარე ჯორჯაძის „სამზარეულო წიგნი“, „ვარდბულბულიანი“, თქმული პირველი მეფისა თეიმურაზისა, გურამიშვილის წიგნი, ასპიდის დაფები, ქართულის საწერი დედნები და საწერი კალმები.
© პროსოპოგრაფიულ მონაცემთა ბაზა, ლინგვისტურ კვლევათა ინსტიტუტი 2018 -