რეგისტრირებული ფაქტები72374
სორტირება ახალი ჩანაწერების მიხედვით
1919
ტიპი: ავტორობა
1919 წლის 28 ნოემბრის გაზეთ „საქართველოს რესპუბლიკის“ ცნობით, სახალხო გვარდიის პირველი რაიონული კრება დაბა ცხინვალიდან საქართველოს მთავრობას ერთგულების ფიცს უგზავნიდა და ჰპირდებოდა, რომ სასტიკად შეებრძოლებოდა ყოველგვარ ანტისახელმწიფოებრივ გამოსვლებს. მისალმებას ხელს ცხინვალის სახალხო გვარდიის კრების თავმჯდომარე დ. მაჭავარიანი აწერდა.
1919
ტიპი: თანამდებობა
გიორგი გვაზავა საქართველოს დამფუძნებელი კრების და ეროვნულ-დემოკრატიული ფრაქციის წევრი იყო.
1919
ტიპი: ღონისძიება
1919 წლის ნოემბერში შეიარაღებული ბრბო, რომელსაც ქორქაშვილი და ბატსაშვილი ხელმძღვანელობდნენ, თავს დაესხა ხაშურის ერობის შენობასა და მილიციის პოსტს. მათ გამგეობის თავმჯდომარე, წევრები და მილიციელები შეიპყრეს.
1919
ტიპი: ღონისძიება
1919 წლის ნოემბერში ქალაქისთავს აცნობეს, რომ მილიციელები სასტიკ ზომებს მიმართავდნენ დაპატიმრებულთა მიმართ, რაც მილიციის უფროსს, ვლადიმერ სულაქველიძეს არ ჰქონდა შემჩნეული. ასეთი ფაქტების არსებობის შემთხვევაში მილიციელი სამსახურიდან უნდა დაეთხოვათ და 345-ე მუხლით დაესაჯათ.
1919
ტიპი: ავტორობა
1919 წლის 6 ნოემბრის გაზეთ „საქართველოს რესპუბლიკის“ ცნობით, გერონტი ქიქოძემ ვაკეში სტადიონის მოწყობასთან დაკავშირებით დამფუძნებელი კრების ხელოვნების კომისიაში დაწვრილებითი მოხსენება გააკეთა. სტადიონამდე ტრამვაის ან ვიწრო ლიანდაგიანი რკინიგზის გაყვანა იგეგმებოდა, მთის კალთებზე დაირგვებოდა ხეები. სტადიონი 100X200 კვადრატული საჟენი(სიგრძის საზომი ერთეული ძველ რუსეთში, უდრიდა 152-176სმ.) იქნებოდა. ვინაიდან ქვის ამფითეატრი ძვირი დაჯდებოდა, ამიტომ იგი უბრალოდ მთის კალთების შესაფერისად გადათხრით გაიმართებოდა.
1919
ტიპი: ღონისძიება
1919 წელს დამფუძნებელი კრების სხდომაზე განხილეს ანარქიასა და სხვა ანტისახელმწიფოებრივ უწესრიგობასთან საბრძოლველად შინაგან საქმეთა მინისტრის, ნოე ბესარიონის ძე რამიშვილის განკარგულებაში 10 მილიონი მანეთის გადადების საკითხი.
1919
ტიპი: ღონისძიება
1919 წლის 9 ნოემბერს დაბა ჩოხატაურში მომხდარ ამბოხებას ხელმძღვანელობდნენ ცნობილი ყაჩაღები – პაიჭაძე და ინგლისელი ექიმის მკვლელი გიორგი ძნელაძე. მოსახლეობამ შეთქმულთა წინააღმდეგ ზომები მიიღო, მდგომარეობა გამოსწორდა და ამბოხების ყველა მონაწილე სასამართლოს გადასცეს.
1919
ტიპი: ღონისძიება
1919 წლის 9 ნოემბერს ბრბო შეიჭრა დაბა ჩოხატაურში და საბჭოთა მთავრობა გამოაცხადა. მათ სახალხო გვარდიის შტაბის წევრი ჩიგოგიძე დაატუსაღეს.
1919
ტიპი: ღონისძიება
1919 წელს ვასილ ბარნოვის 30-წლიანი მოღვაწეობა ქართულმა საზოგადოებამ დიდი ზეიმით აღნიშნა სახელმწიფო თეატრში, სადაც იუბილარი დავით კლდიაშვილთან ერთად მივიდა.
1919
ტიპი: ღონისძიება
1919 წელს საქართველოს რესპუბლიკასა და ინგლისელების მიერ დროებით დაპყრობილ ბათუმის ოლქს შორის ფოსტა-ტელეგრაფის აღსადგენად დადებული ხელშეკრულება გაფორმდა საქართველოს საგარეო საქმეთა მინისტრის მოადგილე ნესტორ ქარცივაძის, ფოსტა-ტელეგრაფის უფროსის, დ. მგელაძისა და კაპიტან გოუტის მონაწილეობით.
ტიპი: ავტორობა
დ. ნახუცრიშვილმა, დრამატული სტუდიის დავალებით, თარგმნა დიდი მთავრის - კონსტანტინე კონსტანტინეს ძის პიესა „მეფე ურიათა“.
1919
ტიპი: თანამდებობა
თბილისის სასამართლო პალატის საგანგებო საქმეთა გამომძიებელი გრაევსკი და ამავე სასამართლო პალატის ბრალმდებლის მოადგილე კალვაიტი სახელმწიფო ენის უცოდინარობის გამო გათავისუფლებულნი არიან თანამდებობებიდან, ამა წლის ნოემბრის პირველიდან სალიკვიდაციო ჯილდოს მიცემით.
1919
ტიპი: ღონისძიება
1919 წელს საქართველოს საგარეო საქმეთა მინისტრის მოადგილემ, კონსტანტინე საბახტარაშვილმა იტალიის პრემიერ-მინისტრ ფრანჩესკო ნიტის საქართველოს ინტერესების დაცვა, დამოუკიდებელ სახელმწიფოდ ცნობა და საქართველოსა და იტალიას შორის სავაჭრო და ეკონომიკური ურთიერთობების დამყარება სთხოვა.
1919
ტიპი: ღონისძიება
1919 წელს სახელმწიფო თეატრში გამართული ლატარიის გათამაშებაზე პირველ ბილეთებს ნოე რამიშვილი ხსნიდა. ყველაზე დიდი რაოდენობით 25000-მანეთიანი მომგებიანი ბილეთები ამოვიდა.
1918
ტიპი: ღონისძიება
1918 წლის აგვისტოში ედუჯანიანცის ბინიდან ბოროტმოქმედებმა 7000 მანეთი მოიპარეს.
1918
ტიპი: ღონისძიება
1918 წლის აგვისტოში სისხლის სამართლის განყოფილების უფროსს, ჩაჩავას შეატყობინეს, რომ ბოროტმოქმედები აბრამიშვილის სახლში შეჭრას და მეპატრონეზე თავდასხმას აპირებდნენ. ჩაჩავა მილიციელებთან ერთად ბოროტმოქმედებს ჩაუსაფრდა და ერთი ცნობილი ყაჩაღი მოკლა, სტუდენტი ბეზურაშვილი კი შეიპყრო.
1918
ტიპი: ნასამართლეობა
1918 წლის 13 აგვისტოს გაზეთ „საქართველოს რესპუბლიკის“ ცნობით, ოჩამჩირეში შეიპყრეს ოსმალეთის საზღვაო ჯარის ოფიცერი განან შაკირ-ოღლი, რომელსაც ჯაშუშობა ბრალდებოდა. დაპატიმრებული გადაეცა ოსმალეთის მისიას.